La surdada dals Grammys en il Staples Center a Los Angeles è daventada in triumf per la chantadura americana Taylor Swift. Ils Grammys valan sco las trofeas da musica las pli prestigiusas. Ins ha surdà els quest onn per la 58avla giada, quai en 83 categorias. Var 13'000 experts da musica han tschernì ils victurs.
In'artista, trais premis
Cun ses album «1989» ha la giuvna da 26 onns gudagnà ils grammofons d’aur per il meglier album da l’onn e per il meglier album da chant da pop. Plinavant hai dà in terz premi, numnadamain per il meglier video musical «Bad Blood».
Il premi sco registraziun da l’onn han survegnì Mark Ronson e Bruno Mars per wurde «Uptown Funk». Sco meglra chanzun da l’onn è vegnida elegida «Thinking Out Loud» da Ed Sheeran. Il Grammy per meglra newcomra va a la chantadura da pop Meghan Trainor (22).
Tribut a musicists defuncts
La saira dals Grammys a Los Angeles era marcada da concerts en memoria a musicists morts. Uschia ha Lady Gaga pajà tribut a David Bowie, il link avra en ina nova fanestraavrir en il browser en in costum en ses stil, ed ella ha chanta in medley da «Space Oddity», «Changes», «Ziggy Stardust», «Let's Dance» ed ulteriurs hits da Bowie.
La gruppaziun da rock Eagles han onurà lur commember fundatur Glenn Frey cun il hit «Take It Easy». Avant aveva Stevie Wonder onurà Maurice White, il fundatur da la band «Earth, Wind & Fire».
Il Grammy per il meglier album da rap ha segirà il rappunz Kendrick Lamar per si’ovra «To Pimp a Butterfly». Justin Bieber ha retschavì ses emprim Grammy – ensemen cun ils DJs Skrillex e Diplo: La single «Where Are U Now» è vegnida premiada sco meglra registraziun en la categoria «dance».
RR novitads 08:00