Las 5 pussanzas da veto da l'ONU e la Germania èn sa cunvegnidas cun l'Iran sin ils puncts principals per ina cunvegna finala, ha confermà il president iranais Hassan Rohani.
La lavur per ina regulaziun cumplessiva cumenzia immediat, ha el declerà. La cunvegna prevesa tenor circuls da diplomats dal vest tranter auter, che l'Iran sminueschia sia capacitad da concentrar uran per passa dus terzs.
La cunvegna cuntegna tranter auter ils suandonts puncts:
- L’Iran dat giu a l’exteriur l’uran ch’è gia vegnì concentrà
- La capacitad da concentrar uran vegn sminuida dovria la forza atomara sulettamain per il diever civil
- Sancziuns cunter l’Iran vegna abolidas pass per pass
- Cunvegna dura 10 onns
Las reacziuns
Il minister da l'exteriur tudestg Frank-Walter Steinmeier ha undrà la cunvegna sco grond pass enavant. Per sigls da legria saja però anc memia baud. Tenor la chanzeliera federala Angela Merkel è la cunvegna in grond merit da tut ils partenaris da tractativas. I saja reussì in impurtant pass per ina cunvegna definitiva davart il program d'atom iranais.
La cunvegna cun l'Iran è in pass istoric.
Tenor il president american Barack Obama è la cunvegna d'atom cun l'Iran in pass istoric. Quella saja la meglra via per evitar che l'Iran bajegia en il zuppà vid ina bumba atomara. La Gronda Britannia discurra dad ina buna basa per ina fitg buna cunvegna finala probabla.
Er il secretari general da l'ONU Ban Ki Moon ha beneventà la cunvegna. Quella porschia cunfins substanzials per il program d'atom iranais e per abolir tut las sancziuns. Sumegliant tuni er dal cussegl d'Europa. La decleraziun communabla dettia speranza per ina cunvegn durabla.
Il ministeri da l'exteriur russ vesa la cunvegna sco positiva per la situaziun da segirezza en il Proxim Orient.
Festas a Teheran
Suenter la decisiun da principi en la dispita d'atom cun l'Iran hai dà en la chapitala iranaisa Teheran festas spontanas. Perditgas han rapportà che 10'000 hajan festivà l'entira notg e clamà: "Ruhani, Sarif, nus engraziain". Cunzunt giuvenils èn ids sin via. Ord ils autplidaders dals blers autos hajan ins udì la chanzun "Happy" da l'American Pharell Williams.
Protest da l’Israel
Il cabinet da segirtad da l'Israel refusescha la cunvegna d'atom cun l'Iran. Quai ha in pledader dal primminister israelian communitgà suenter ina sentupada dal cabinet cun represchentants da segirtad. Gia avant aveva il primminister Benjamin Netanjahu exprimì ferma critica en connex cun la cunvegna. Il pajais vegnia a sa stentar vinavant per evitar ina nauscha cunvegna da las pussanzas mundialas cun l'Iran.
RR novitads 06:00/16:00
