Siglir tar il cuntegn
Inhalt

Exteriur Telefonins vegnan scumandads en scolas franzosas

Il parlament franzos ha scumandà il diever da telefonins en scolas. Suletta excepziun datti tar il diever pedagogic en classa. La regulaziun severa è stada in'empermischun dal president franzos Emmanuel Macron durant ses cumbat electoral.

Purtret d'ina giuvna che dovra il telefonin sco pledari per translatar il pled «vuloir» en tudestg.
Legenda: En futur èn telefonins en Frantscha da principi scumandads en scolas. Keystone

L'assamblea naziunala ha approvà in'ulteriur scumond da telefonins en scolas. La nova lescha scumonda da principi il diever da telefonins u tablets en scolas primaras e secundaras.

Gia dapi il 2010 na pon scolaras e scolars betg duvrar lur telefonins durant la scola. Plinavant pon las scolas era fixar reglas pli severas en lur urden da chasa. En futur vegnia ad esser cuntrari: Il diever da telefonins è da principi scumandà sin l'entir areal da scola. L'urden da chasa po dentant lubir excepziuns. Quai per exempel sch'il telefonin vegn duvrà per il diever pedagogic.

La proposta per la lescha è vegnida da la partida Republique en Marche dal president Emmanuel Macron. Cun la nova lescha accumplescha Macron in'empermischun da ses cumbat electoral.

RR novitads 11:00