Siglir tar il cuntegn

Header

Purtret d'ina persuna sinina schlieusa ed ils chauns che tiran davant.
Legenda: Bleras cursas da chauns da schlieusa han stuì vegnir desditgas perquai ch'il glatsch è memia satigl. Keystone
cuntegn

Exteriur Temperaturas da record ad Alaska

Il mument sto il stadi federativ da l'USA sbatter cun in'unda da chalira da record. Gist en il nord arctic giaschan las temperaturas il mument per radund 20 grads pli ad aut che normal. Quai ha declerà l'expert da clima Rick Thoman dal «Alaska Center for Climate Assessment» a Faribanks.

En la citad Barrow a la costa dal nord d'Alaska hajan ins mesirà gievgia -1°C – Normal fissan da quest temp temperaturas da -20°C. En bleras citads haja dà numerusas temperaturas da record. Questa fin d'emna duai perfin vegnir anc pli chaud. Thoman vesa in connex tranter las temperaturas chaudas e la midada dal clima. Er il favrer saja gia stà fitg chaud.

Nus avain il mument aura d'avrigl u matg durant il mars.
Autur: Rick ThomanAlaska Center for Climate Assessment

Alaska è pertutgà fitg da la situaziun. Bleras cursas da chauns da sclieusa han stuì vegnir desditgas pervi da la mancanza da naiv. Era datti problems tar il traffic. Flums schelads na pon betg vegnir duvrads per autos e camiuns perquai ch'il glatsch è memia satigl.

I pudess er esser che la populaziun da chauns da mar è pertutgada da la chalira. Las mammas partureschan numnadamain normalmain lur pitschens sin il glatsch. Ed er ils pestgaders da giombers pateschan. Normalmain piglian els ils animals davent da tocs da glatsch. Quels n'èn il mument dentant betg stabils.

RR novitads 09:00