Siglir tar il cuntegn
Inhalt

Exteriur Tenor l’ONU n’è ina victoria militara en la Siria betg pussaivla

L'incumbensà spezial da l'ONU per la Siria, Staffan de Mistura, avertescha instantamain il president da la Siria, Baschar al-Assad, da vulair tschertgar ina decisiun militara en la guerra civila.

Ina gronda rusna en ina via en l'ost da la citad Aleppo.
Legenda: In sajet ha fatg ina gronda rusna en ina via dal quartier al-Quaterji en l’ost da la citad Aleppo. Reuters

Il conflict saja da terminar sulettamain cun ina schliaziun politica, ha ditg Mistura en las gasettas svizras ‘Tages-Anzeiger’ e ‘Der Bund’. Uschiglio smanatschia ina guerra civila da blers onns en las regiuns champestras e bumbas en autos en las citads. Nagin na possia avair in interess vid ina tala guerra, er betg la Russia. Ensemen cun l’Iran è la Russia l’allià il pli impurtant dal reschim sirian.

Nagina pausa da cumbat

I stoppia dar in cumpromiss per l'ost da la citad Aleppo, pretenda Staffan de Mistura. La fin d’emna passada aveva quel empruvà da persvader la regenza siriana d’ina pausa da cumbat per ils quartiers bloccads d’Aleppo. La regenza aveva dentant refusà d’interrumper sias attatgas.

La populaziun d'Aleppo è victima

Tenor De Mistura saja bain pussaivel che la regenza siriana vegnia da conquistar l’ost d’Aleppo, cura che questas parts da la citad sajan bunamain destruidas. En quest cas saja da quintar cun ina gronda tragedia per ils umans, e cun dieschmillis da fugitivs che tschertgian da cuntanscher la Tirchia.

RR novitads 06:00