- L'armada dal Israel annunzia la notg passada in'attatga da rachetas en direcziun da lur basa sin il Plateau dal Golan.
- Tenor indicaziuns israelianas duain truppas iranaisas or da la Siria esser responsablas per questa attatga.
- Intginas rachetas hajan ins pudì destruir. Infurmaziuns davart blessadas na datti betg.
- Medias a Damascus rapportan il medem temp d'attatgas israelianas sin territori dal stadi da la Siria.
Tar attatgas ord l'aria da l'Israel en direcziun basas militaras iranaisas en la Siria èn tenor il minister da la defensiun Avigdor Lieberman bunamain l'entira infrastructura da l'Iran vegnida tutgada. Percunter na sajan naginas da las 20 rachetas sajettadas en direcziun Plateau dal Golan detunadas. Quai tenor indicaziuns da Lieberman a chaschun d'ina conferenza da pressa. Ins haja pudì destruir quatter rachetas. El speria che questa «episoda» saja ussa a fin. Els n'hajan nagin interess vid ina escalaziun.
Pli u main il medem temp rapportan medias da la Siria d'attatgas dal Israel sin miras en la Siria. Pliras rachetas duain avair tutgà miras en la provinza Quneitra en il sidvest da la Siria. Ed era aviuns da cumbat israelians duain esser stads en acziun.
Las attatgas da rachetas preoccupescha l’entir mund
Las regenzas da la Germania, da la Frantscha e da la Gronda Britannia supplitgeschan las partidas da sa tegnair enavos. Er la Russia è sa mussada preoccupada. Sco il minister da l’exteriur Sergej Lawrow ha ditg, haja la Russia appellà tant l’Iran sco er l’Israel da desister da provocaziuns. Da l'autra vart vesan ils Stadis Unis da l'America ils schabetgs sco cumprovà ch'ins na possia betg sa fidar da l'Iran.
RR novitads 06:00