Siglir tar il cuntegn

Header

cuntegn

Tensiuns China haja terminà ils exercizis militars enturn il Taiwan

Or da protesta cunter la visita da la politicra dals Stadis Unids Nancy Pelosi en il Taiwan, ha la China mess or da funcziun il dialog cun ils Stadis Unids davart la protecziun dal clima ed autras cooperaziuns. En pli hani cumenzà cun exercizis militars enturn il Taiwan.

La China ha tenor atgnas indicaziuns per il mument terminà ses exercizis militars enturn il Taiwan suenter radund in'emna. I saja vegnì fatg pliras incumbensas cun success, communitgescha il commando responsabel da l'armada. I saja però vinavant planisà patruglias regularas e trenaments militars. Ils Stadis Unids renconuschan il Taiwan sco stadi independent. Per la China è l’insla dentant ina provinza malfidaivla.

Tenor las autoritads da Taiwan hajan pliras navs chinaisas surpassà la lingia da cunfin en la mar tranter l'insla da Taiwan e la terra ferma da la China. En pli sajan stads plirs eroplans chinais en acziun. La China simuleschia cun quests exercizis in'attatga sin il Taiwan. Il Taiwan haja reagì cun sgols d'exploraziun e patruglias da la marina.

China interrumpa discurs cun ils Stadis Unids

Sco quai ch’il ministeri da l’exteriur ha communitgà il venderdi a Peking, vegnan trais forums da dialog en connex cun dumondas militaras e da defensiun stritgads cumplettamain. La China interrumpa la collavuraziun tar il cumbat cunter drogas, crims sur ils cunfins, en cas da l’assistenza giudiziala en cas criminals ed en connex cun la repatriaziun d’umans ch’èn entrads illegalmain.

Presidenta dal Taiwan numna las manevras «irresponsablas»

La presidenta dal Taiwan, Tsai Ing-wen ha numnà las manevras chinaisas en la mar enturn il pajais «irresponsablas». La presidenta ha dumandà la China en in pled da video da restar raschunaivla e precauta. Il Taiwan na veglia betg laschar escalar las tensiuns, mabain mantegnair il status quo. Il pajais communistic è grit perquai ch'el recloma il Taiwan sco territori chinais.

Visita da Nancy Pelosi

Mardi è Pelosi arrivada en la chapitala Taipeh en il rom da ses viadi tras l'Asia. En vista a las smanatschas da la China ha Pelosi garantì il sustegn dals Stadis Unids al Taiwan. La visita è stada dispitaivla, damai ch'il status dal Taiwan è in dals conflicts principals tranter las duas pli grondas economias dal mund.

Strusch ch'ella ha puspè bandunà il Taiwan, ha la China reagì cun repressalias cunter l'insla. La China n'exporteschia per il mument betg pli sablun en il Taiwan. Cuntrari n'importa ella betg pli tscherts fritgs da citrus e diversas sorts da peschs. Quai ha annunzià il ministeri da commerzi.

Or da l'archiv:

video
China simulescha attatga sin il Taiwan
Or da Tagesschau dals 06.08.2022.
laschar ir. Durada: 1 minuta 52 Secundas.

RTR novitads 20:00

Artitgels legids il pli savens

Scrollar a sanestra Scrollar a dretga