La Corea dal Nord ha crititgà l'exercizi militar communabel dals Stadis Unids e la Corea dal Sid. Quests exercizis sajan stads ina «provocaziun averta» ed in exercizi da guerra privlus, citeschan medias statalas nordcoreanas il militar da la Corea dal Nord. Il pajais annunzia ina «reacziun decidida».
Cun ina tscherta regularitad datti sin la mar datiers da la Corea demonstraziuns dad armas. Ils Stadis Unids e la Corea dal Sid han cumenzà l'entschatta da l'emna passada in manever grond dal militar. La Corea dal Nord ha silsuenter fatg plirs tests da rachetas durant quest temp.
Las regenzas a Washington e Seoul averteschan gia dapi mais che la Corea dal Nord pudess puspè far tests cun armas atomaras. I fiss l'emprima giada dapi l'onn 2017.
Test cun racheta intercontinentala
Sonda èsi vegnì sajettà quatter rachetas dal territori da la Corea dal Nord. Quai ha il militar da la Corea dal Sid rapportà. Ina da las rachetas è crudada en la mar avant la costa da la Corea dal Sid. Quai è insatge che n'è enfin uss anc mai capità. In'autra saja probabel stada ina racheta intercontinentala. Suenter 130 kilometers saja quella sfundrada en la mar.
Glindesdi avevan la Corea dal Sid ed ils Stadis Unids da l'America cumenzà cun exercizis militars cun 240 aviuns en la regiun. L'emprima giada dapi il 2017 avevan els era duvrà bumbardaders. Mesemna aveva la Corea dal Nord lura fatg agens exercizis e sajettà 23 rachetas.
