Siglir tar il cuntegn

Header

cuntegn

Exteriur Terror a Paris: Sajettims, 2 morts e 7 arrestaziuns

La polizia a Paris ha terminà ina razzia a Saint-Denis suenter radund 7 uras. Quai ha confermà in pledader da la regenza. Tar la razzia cunter ils tirafils probabels dals attentats dal venderdi passà, è ina dunna sa siglientada en l'aria ed in um è vegnì mazzà. 7 persunas èn vegnidas arrestadas.

Trais umens ch'eran sa zuppads en in'abitaziun èn vegnids arrestads suenter sajettims vehements, communitgescha la procura publica. Duas persunas sajan vegnidas arrestadas en in'abitaziun dasperas e duas ulteriuras en la vischinanza.

La polizia ed il militar èn a St. Denis en il nord da Paris.
Legenda: Er radund 50 schuldads èn stads en acziun per segirar il lieu. Keystone

Tar ils sajettims sajan 5 policists sa blessads levamain. Tar la razzia a Saint-Denis erian er radund 50 schuldads en acziun per segirar il lieu.

Davart l’identitad dals 7 arrestads na datti anc naginas indicaziuns detagliadas, pia era betg sch’il tirafils dals attentats dal venderdi passà a Paris cun 129 morts sa chatta era tranter ils arrestads.

Surveglià discurs al telefon

Ils investigaders a Paris han chattà l'abitaziun dals suspectads da terror entras l'analisa da discurs al telefon survegliads. Or dals discurs haja quai dà indizis che Abdelhamid Abaaoud pudessia esser en l'abitaziun conspirativa a Saint-Denis, ha ditg il procuratur public responsabel, François Molins.

audio
Mezdi: Terror a Paris – Situaziun tranter tema e vita dal mintgadi
ord Actualitad dals 18.11.2015.
laschar ir. Durada: 3 minutas 4 Secundas.

Era en auters pajais è la polizia en alarm

A Hannover tschertga la polizia ils culpabels per la smanatscha da bumba dad ier saira. Il gieu da ballape tranter la Germania e l’Ollanda ha stuì vegnir detg giu per motivs da segirtad. Fin uss haja la polizia dentant anc arrestà nagin ed era betg anc chattà material explosiv.

Era senza success ha la polizia tudestga intercurì in center d'asil a Rostock. In vischin aveva pretendì d’avair vesì il terrorist suspectà da Paris en quest center.

Identifitgà tuttas 129 unfrendas

Ils investigaders en la Frantscha han identifitgà tuttas 129 unfrendas da las attatgas terroristicas a Paris. Enfin la fin da l'emna sajan era terminadas tut las autopsias ha communitgà il palaz d'Élysée. Mintgamai suenter in'autopsia fa la procura publica ils documents necessaris per pudair sepulir la persuna morta.

RR novitads 12:00/14:00

Artitgels legids il pli savens