Trais teams da terrorists han attatgà 6 lieus a Paris. Els hajan fatg diever da Kalaschnikows e sajan stads equipads cun ils medems librocs cun material explosiv, ha ditg il procuratur public Francois Molin sonda saira a Paris. Il mument saja il dumber d'unfrendas tar 129. Quai possia dentant anc sa midar. 99 dals 352 blessads hajan grevas blessuras. Tranter ils blessads saja er ina dunna Svizra. Quai ha confermà il Departement federal d'affars exteriurs.
Durant il suentermezdi haja la polizia beltga arrestà pliras persunas en il quartier Molenbeek a Brüssel. Ina dad ellas saja stada venderdi saira a Paris. Perditgas avevan vesì in auto affittà cun in numer beltg datiers da la sala da concert Bataclan.
Era a Londra, sin la plazza aviatica da Gattwick, è vegnì arrestà in um, in Franzos che purtava cun el «insatge che vesa ora sco in’arma». La polizia englaisa na sa e vul dentant betg far in connex concret cun las attatgas a Paris. Uschia rapporta la BBC.
Identifitgà in dals attentaders
L’agentura da novitads AFP, sco era la gasetta franzosa «Le Monde» rapportan ch’ins haja pudì identifitgar in dals attentaders dal club Bataclan.
I sa tractia d’in Franzos da var 30 onns. Apparentamain era el enconuschent a la polizia ed al servetsch secret.
Chattà pass sirian sper ina da las baras
Ils auters attatgaders, ch’èn sa siglientads la notg en l'aria a Paris, pudessan dentant per part derivar da l’exteriur. Ins ha chattà in pass sirian sper ina da las baras dals attentaders. Il proprietari da quest pass è vegnì registrà sco fugitiv sin l’insla greca Leros l'entschatta october. Quai han las autoritads grecas fatg enconuschent en il decurs da la saira.
Almain 8 terrorists eran cumpigliads
Las attatgas èn vegnidas fatgas dad almain 8 terrorists. In dals attentaders ha la polizia sajettà giu, ils auters èn sa sajettads en l’aria.
Venderdi saira eran mortas almain 129 persunas tar ina seria d'attatgas en il center da la chapitala franzosa. Ils ospitals publics da Paris han tractà en tut var 300 persunas blessadas tar las attatgas terroristicas. 80 dals blessads sajan en in stadi fitg serius, annunzian ils ospitals.
Emprims blessads han pudì bandunar ils ospitals
53 persunas han gia pudì bandunar ils ospitals quest suentermezdi. La gronda part dals pertutgads è tenor ils ospitals sut schoc e patescha da traumas che basegnan ina tgira a pli lunga vista.
SI ha instradà attentats
La gruppa da terror Stadi Islamic ha declerà d'avair instradà las attatgas da Paris. Ed ella smanatscha cun ulteriuras attatgas. La gruppa ha publitgà ina decleraziun sin l'internet. Las attatgas sajan sa drizzadas envers la Frantscha che fetschia ina cruschada, ina guerra en il num da la religiun.
Avant aveva gia il president franzos François Hollande fatg responsabla la gruppa da terror Stadi Islamic per las attatgas da venderdi saira. Ed el ha annunzià da manar in dir cumbat cunter dschihadists en la Frantscha ed en l'exteriur.
Arrestà in eventual cumplizi
La polizia da la Baviera ha gia arrestà avant in pèr dis in eventual cumplizi dals attentaders da Paris.
Ina persuna che pudess avair da far cun las attatgas saja en arrest, ha ditg il primminister da la Baviera Horst Seehofer.
Il pledader da la polizia da la Baviera ha ditg ch'els hajan arrestà in um da 51 onns dal Montenegro sin in'autostrada. En ses auto hajan els chattà 8 pistola-mitraglias ed ulteriuras armas. Il radio da la Baviera ha menziunà ultra da quai che la polizia haja chattà muniziun e material explosiv.
RR novitads 15:00 / 18:00 / 21:00
