Siglir tar il cuntegn

Exteriur Terror: La Belgia ha arrestà dus frars

Para vegn la Belgia puspè en il visier da terrorists. Policists han uss arrestà dus suspectads. En il pajais vala anc adina il segund stgalim d’alarm da terror.

En la Belgia ha la polizia arrestà duas persunas che vegnan suspectadas d’avair planisà attatgas terroristicas. Ils dus frars sajan vegnids arrestads tar razzias a Mons e Lüttich. Quai ha communitgà la procura publica beltga.

Las arrestaziuns èn stadas en connex cun investigaziun tar en tut otg razzias. Armas e material explosiv n’han ins betg chattà.

Per las autoritads resta in privel serius

Tenor ils investigaders na datti nagins indizis che las persunas suspectadas eran involvidas en las attatgas da terror a Brüssel ils 22 da mars. Tar questas duas attatgas terroristicas sin la plazza aviatica e la metro a Brüssel eran 32 persunas vegnidas mazzadas e passa 300 blessadas.

Per la Belgia vala il mument il segund aut stgalim d’alarm da terror. Quai munta che las autoritads taxeschan il privel da terror sco «serius e pussaivel».

RR novitads 14:00