Plirs observatoris da terratrembels avevan registrà oz en damaun la detunaziun.
La Corea dal Sid ha sinaquai immediat ditg ch'i savessi esser stà in test atomar e convocà ina sesida urgenta dal cussegl da segirezza. Entant ha la Corea dal Nord confermà d'avair fatg in test nuclear cun ina bumba idrogenica. I saja l'emprim test en questa furma.
Tranter il nord communist ed il sid democratic regia formalmain anc adina stadi da guerra. La fin november avevan domadus pajais declerà da vulair far ina nov'emprova per schluccar la situaziun.
Cussegl da segirtad da las Naziuns Unidas preoccupà
Il cussegl da segirtad da las Naziuns unidas ha convocà ina sesida urgenta per oz mesemna. Ils commembers duain sa radunar per sa cussegliar, co cuntinuar.
«Er sche nus na pudain anc betg confermar ch'igl è vegnì fatg in test, condemnain nus scadina violaziun da las resoluziuns da l'ONU ed appellain a la Corea dal Nord da sa tegnair vid cunvegnas internaziunalas», ha ina pledadra da la Naziuns Unidas ditg.
A la Corea dal Nord smanatschan sancziuns
En il Giapun ha il primminister Shinzo Abe ditg ch'il test na saja betg acceptabel. A la Corea dal Nord smanatschian sancziuns internaziunalas anc pli severas. Ed er il vice minister da l'exteriur sidcorean, Ling Sum Nam ha ditg ch'il test saja ina provocaziun e violeschia cleramain las resoluziuns da l'ONU. Da la medema opiniun è il minister da l'exteriur britannic, Philipp Hammond, quai ha el communitgà via il servetsch da novitads curtas twitter.
RR Novitads 06:00+