Talas dronas èn privlusas. Sch’ina tala drona stuess attatgar ina persuna specifica, sto la drona era chattar la gista persuna e betg la faussa. Vul dir ins sto esser segir che la drona n’attatga betg tuttenina civilists. La drona duai differenziar amis dad inimis dapli che mo 100%.
La guerra mida sia fatscha
In auter privel ha l’expert dad intelligenza artifiziala Stuart Russell declerà suandantamain. Sch’ins ha 100'000 schuldads e mintgin ha ina arma, sche lura èn quai 100'000 schuldads cun ina arma. E sch’in da quels schuldads ha in nausch intent, èn anc tut tschels d’enturn.
Però sche nus avessan 100'000 dronas autonomas e mo in unic schuldà, e quel ha in nausch intent, sche lura ha quel gronda pussanza. Perquai fissi impurtant che las dronas na vegnissan betg en ils faus mauns.
Il temp curra
Angela Kane da las Naziuns unidas ha intunà, ch’i saja uss temp ed ura da seser ensemen vi dad ina maisa. Quai per discutar davart talas dronas autonomas e metter en scrit diversas reglas. Ed ella ha manegià che per questa discussiun stuessan vegnir ensemen tut quels ch’èn en ina moda involvids. Dals politichers fin als experts e fin l'industria ed uschè enavant...
E quai stoppia succeder il pli spert pussibel, perquai ch’il svilup tecnologic è svelt, fitg svelt...