Siglir tar il cuntegn

Exteriur Tgi ha il pli bel tricot al campiunadi mundial?

32 naziuns dattan actualmain al campiunadi mundial da ballape. El mintgadi na vegn dentant betg mo discurrì dal ballape, mabain era da las frisuras e natiralmain era dals tricots. Tge tiara ha ils pli bels e tge tiara ils pli trids?

Jorge Campos
Legenda: L'anteriur goli dal Mexico, Jorge Campos, era adina enconuschents per sias monduras extravagantas. Keystone

Anna Laura Klucker ha studegià design ed è ina experta sch’i va per la moda. Ella ha analisà intensivamain tut las monduras da las equipas naziunalas al campiunadi mundial da ballape.

Il tricot da la Svizra croda tras

La mondura da la Svizra è ina da questas monduras, che fa scurlar il chau la giuvna da 22 onns. Il tricot è classic cotschens cun in zic alv, ma i dat pliras chaussas che disturban Anna Laura Klucker. I saja vegnì integrà lingias altimetricas (Höhenlinien) e quai guarda ora memia tschertgà e simplamain suenter da memia. Plinavant disturba ella co las cifras ed ils bustabs vesan ora sin il tricot. «Ins sa quasi buc leger quai che stat scrit».

Tenor mai è il tricot da la Spagna sgarschaivels.
Autur: Anna Laura Kluckerexperta da moda

Sper la mondura da la Svizra datti anc ina segunda che plascha insumma buc a la giuvna da Tumein, numnadamain quella da la Spagna. Il tricot è cotschens, ma da la vart èsi vegnì integrà ulteriuras colurs, tranter auter violet – e quai en in muster fitg spezial. «Quest tricot è propi sgarschaivels».

«Tricots simpels plaschan a mai»

Pli pauc saja magari pli bler, di Anna Laura Klucker. Tenor l’experta da moda vegni savens empruvà da far insatge spezial, ma il bler na gartegia quai betg.

Il tricot che plascha il meglier ad ella è il segund tricot dal Mexico. Ina mondura alva cun sdrimas orizontalas, ina en cotschen ed ina en verd. Malgrà ch’igl è atgnamain fitg simpel, haja questa mondura anc quai zic ch’ina bella mondura dovria.

RR actualitad 17:00