La mesemna saira è ì a fin l’emprim di da l’inscunter suprem dals schefs dals stadis e da las regenzas dals commembers da l’Uniun europeica UE a Salzburg – quai puspè senza che l’UE e la Gronda Britannia èn sa cunvegnidas davart il Brexit.
May: Soluziun UE signifitga partir si la Gronda Britannia
Puspè ha la primministra Britannica Theresa May refusà la proposta da la cumissiun da l’UE davart ils cunfins en l’Irlanda dal Nord. L’UE propona numnadamain a la Gronda Britannia da laschar la provinza da l’Irlanda dal Nord en il martgà intern ed en l’uniun da dazi da l’UE per il cas ch’i na dettia betg ina soluziun.
Per May na va quai betg: Quella varianta signifitgass «la spartiziun giuridica da la Gronda Britannia en dus regiuns da dazi» rapporta la SDA.
Brexit duai valair a partir dals 29 da mars 2019
La gievgia prevesan ils schefs dals stadis e las regenzas dals 27 commembers da l’UE da discutar la fasa finala da las tractativas da Brexit senza la primministra May.
En in referendum istoric era la Gronda Britannia sa decidida da sortir da l’UE. Sche Londra e Brüssel na vegnan betg perina fin ils 29 da mars 2019 davart ils detagls, datti in Brexit senza cunvegna.
RR novitads 06:00