Cun larmas en ils egls ha la primministra britannica declerà ch'ella sa retira ils 7 da zercladur. Ella sa retira era sco scheffa da la partida conservativa.
Igl è, e vegn adina a restar in affar da profund displaschair per mai ch'i n'è betg gartegià a mai da realisar il Brexit.
La partida da May crititgescha ella pervi da sia politica davart il Brexit. May ha empruvà pliras giadas da cuntanscher ina maioritad en il parlament per la cunvegna da sortida da l’Uniun europeica, ma senza success. Gia daditg era la posiziun da May flaivla. Ella era da pliras varts massivamain sut squitsch, betg il davos er davart deputads amiaivels vers l'UE ed aderents dirs dal Brexit en sia atgna partida conservativa.
Er il pajais sez è dividì dapi la votaziun dal referendum dal Brexit avant bunamain trais onns. Lura aveva Theresa May surpiglià il post sco prim-ministra da David Cameron.
Trais giadas ha ella fatg naufragi en il parlament cun la cunvegna da sortida ch'ella ha contractà cun Brüssel. Ina quarta votaziun era gia en vista, ussa na datti betg quella.
Reacziuns
Reacziuns hai dà aifer la Gronda Britannia sco era ord l'UE:
- Jeremy Corbin, schef da l'opposiziun da la partida Labour, pretenda elecziuns novas: Ni la primministra Theresa May ni sia partida dividida sajan en il stan da reger il pajais. La decisiun da May d'abditgar saja endretga.
- Nigel Farage, il represchentant britannic da la partida Brexit en il parlament da l'Europa e grond aderent dal Brexit, renfatscha a May d'avair stimà fauss l'entira situaziun.
- Jean-Claude Juncker, il president da la cumissiun da l'UE, vul collavurar cun respect era cun il successur da May. Vid la posiziun da l'UE davart il Brexit na sa midia dentant nagut.
- Angela Merkel, la chanceliera tudestga, ha prendì enconuschientscha «cun respect» da la decisiun da May. La Germania giavischia ina sortida ordinada da la Gronda Britannia.
Gia tschintg candidats
Theresa May è dapi bunamain 3 onns primministra da la Gronda Britannia. Tgi che succeda ad ella n’è betg cler. In di suenter l'annunzia da demissiun da Theresa May han gia plirs conservativs annunzià lur interess al post. Suenter Boris Johnson, Jeremy Hunt, Esther McVey e Rory Stewart ha la sonda er il minister da sanadad Matt Hancock declerà, ch'el sa participeschia a la procedura da tscherna per il post da schef da regenza.
Las meglras schanzas pudess avair Boris Johnson - anteriur president da la citad da Londra, anteriur minister da l'exteriur e la fatscha prominenta per in Brexit. Gia l'onn 2016, cura che Theresa May è vegnida elegida, valeva el sco candidat pussaivel – el ha quella giada dentant desistì d'ina candidatura.
RR novitads 11:30
