Siglir tar il cuntegn
Inhalt

Exteriur Theresa May vul succeder a Cameron

La ministra da l'intern britannica Theresa May candidescha per il presidi da la partida conservativa ed uschia per la successiun da primminister David Cameron.

Theresa May ministra dal intern da la Gronda Britannia.
Legenda: Theresa May ministra dal intern da la Gronda Britannia. Keystone

Theresa May vul daventar presidenta dals conservativs en Gronda Britannia ed uschia succeder a David Cameron. En ina brev a la gasetta «The Times» ha ella annunzià sia candidatura. May che ha 59 onns vala sco persuna equilibrada en la partida conservativa dals Torys. Theresa May era cunter la sortida da la Gronda Britannia da l'UE. In punct central vesa ella da far la Gronda Britannia in pajais che funcziuna per tuts ed uschia dar dapli paisa a la politica sociala, scriva May.

Candidescha Boris Johnson?

Il maletg mussa Boris Johnson, anteriur president da Londra
Legenda: Boris Johnson, la fatscha e la vusch dal Brexit en Gronda Britannia Keystone

L’anteriur burgamester da Londra Boris Johnson vala sco l'adversari il pli grond da Theresa May. Johnson n'ha però betg anc annunzià ina candidatura. Il termin intern da la partida per annunziar ina candidatura scada oz gievgia da mezdi.

Enturn Boris Johnson èsi vegnì ruassaivel dapi la votaziun dals 23 da zercladur. Ed i dat era bleras vuschs che din "ABB - Anyone But Boris", quai munta "mintgin - mo betg Boris". Schegea ch'el è stà la fatscha e la vusch dal Brexit e giauda grondas simpatias - tranter auter era pervia da sia cumparsa e sias provocaziuns - paran blers da vulair insatgi auter che maina las tractativas cun l'Uniun Europeica.

In'emna suenter il Brexit: Nagin ha in plan

Suenter il schoc regia ussa malsegirtad en Gronda Britannia, surtut era perquai che nagin para d'avair in'idea co vinavant. Ils promoturs dal Brexit han concedì d'avair fatg sbagls: Els na possian betg realisar tut quai ch'els hajan empermess avant la votaziun, p.ex. reducir l'immigraziun, investir daners en il sectur da sanadad enstagl trametter quels a Brüssel etc.

RR actualitad bunura