Siglir tar il cuntegn

Header

Tim Enderlin
Legenda: Tim Enderlin. RTR, Adrian Camartin
cuntegn

Exteriur Tim Enderlin – Noss um a Laos

Quels dis s'inscuntran ils schefs da stadi dals pajais da l’Asia dal Sidost a Vientiane, la chapitala da Laos. Il focus da l’inscunter da la gruppa ASEAN stat il svilup da l'economia. En quest sectur ha il Laos fatg gronds sforz. Uschia hai dà investiziuns en ovras idraulicas, vias e l'agricultura.

D'interess è il Laos era per la Svizra. Tim Enderlin, oriund da l'Engiadina, maina a Vientiane il biro da la DEZA per la cooperaziun cun il Laos e la regiun dal Mecong.

Dapi in onn viva Tim Enderlin ussa a Laos. Betg l’emprima giada ch'el è en missiun en l’exteriur. Dapi 20 onns lavura el tar l’EDA, il Departament federal per ils fatgs da l’exteriur, è gia stà en il Pakistan ed en l'Etiopia.

Sia lavur sa basia sin trais pilasters, di Enderlin. Modernisar l'agricultura, promover las structuras communalas e megliurar la furmaziun professiunala.

La finamira è da pussibilitar als giuvens da sviluppar lur talents per silsuenter er chattar ina lavur. Senza educaziun na sa sviluppa il pajais betg.
Autur: Tim EnderlinManader dal biro da cooperaziun a Vientiane

Sco manader dal biro da cooperaziun da la DEZA en la chapitala Vientiane saja el era responsabel per ils biros en ils pajais vischins Cambodscha e Vietnam.

En tut quels pajais dovri pazienza, la vita saja fitg differenta da quella en Svizra.
«I dovra flexibilitad, in senn per l’improvisaziun che nus en il vest avain probabel pers in zic.»

L’um da 50 onns raquinta d’ina situaziun tipica. Problems cun l’access d’internet.

Quai va uschia dus dis, tuttenina vegnan ils tecnicists ma segir lura cura che nagin è a chasa. Savens èsi il medem cabel ch’è defect ma enstagl da midar or quel vegn el reparà uschia che jau sai precis ch’ins sto puspè telefonar ad els en in’emna.
Autur: Tim Enderlin

Ina gronda midada saja la plazza nova era stada per sia dunna ed ils dus uffants. Malgrà ch'els hajan ponderà bain ed hajan era gì in onn temp per sa preparar saja il pass stà grond.

«Midar il pajais, midar la cultura e midar la lingua. Per ils uffants che han stuì emprender dad in di sin l’auter l’englais ha quai dumandà ina gronda flexibilitad. E quai dovra era temp.»
Oz sappia el dentant dir ch'els sajan sa vivì en bain.

Quai che manchia mintgatant saja la cuschina ed il clima svizzer.

Igl è adina umid e chaud, tranter 32 e 42 grads. E quest midament da las stagiuns ch’è uschè bel en Svizra, quai manca mintgatant.
Autur: Tim Enderlin

Anc trais onns vegn la famiglia Enderlin a restar a Laos. Tge che vegn suenter n’haja el anc betg studegià. Impurtant saja ussa da sa concentrar sin la lavur e betg da far plans per il futur, di Tim Enderlin. Insatge vegni schon a sa dar.

Artitgels legids il pli savens

Scrollar a sanestra Scrollar a dretga