Siglir tar il cuntegn

Header

La notg da l'emprova da putsch il 2016.
Legenda: Tirchia Caos sin las vias: La notg da l'emprova da putsch il 2016. keystone
cuntegn

Tirchia 5 onns suenter l'emprova da putsch – quai è sa midà

Volker Pabst, il correspundent da la Neue Zürcher Zeitung ad Istanbul guarda enavos sin ils ultims 5 onns dapi l'emprova da putsch en la Tirchia. Il pajais saja sa midà, dentant betg exnum en ina buna direcziun per la populaziun, di el.

La repressiun è suenter l'emprova da putsch vegnida anc bler pli gronda. Quai munta in curs anc bler pli sever, sco ina bler pli gronda persecuziun dad inimis politics, arrestaziuns e relaschadas da massas.
Autur: Volker PabstCorrespundent NZZ

SRF mussa en sia rapportaziun insaquants exempels per arrestaziuns. Ina dunna saja vegnida accusada d'esser part d'ina gruppa terroristica perquai ch'ella haja bittà en las merdas in cudesch da Fettulah Gülen, il spiritual islamistic che vegn accusà d'avair tratg ils fils dal putsch dal 2016. Autras persunas èn vegnidas arrestadas per avair chargià in'app sin il telefonin che saja in indizi per esser in «gülenist». Esser critic envers la regenza saja pia daventà pli malsegir ils ultims onns.

audio
Sguard enavos sin il putsch en Tirchia
02:56 min, Actualitad dals 15.07.2021.
laschar ir. Durada: 02:56 minutas.

Erdogan perda popularitad

Recep Tayyip Erdogan ha pers bler sustegn en la populaziun dapi l'emprova da putsch sco l'expert Volker Pabst di vinavant. Dentant betg be pervi da sia politica repressiva, mabain er pervi dals problems economics dal pajais. «Bleras persunas han pers daners e fan responsabla la regenza per quai». Ils problems economics hajan cumenzà gia avant la pandemia da corona.

La populaziun saja oz spartida pli fitg che anc il 2016 – en quels che sustegnan Erdogan e quels ch'èn critics envers el. Dentant ils critics na dastgan ins betg scumbegliar cun ils putschists dal 2016. Oz èn ils critics per exempel persunas che s'engaschan per dretgs umans ubain che vulan ina democrazia pli pluralistica.

audio
Tirchia en las grifflas dal president?
02:49 min, Actualitad dals 15.07.2021.
laschar ir. Durada: 02:49 minutas.

Temp per in nov president?

Las proximas elecziuns per il presidi da la Tirchia èn l'onn 2023. Erdogan vegn ad empruvar cun tutta forza da gudagnar quellas elecziuns, di Pabst, perquai che la data è er ina data istorica: il 2023 po la Tirchia festivar 100 onns dapi che la Tirchia moderna è naschida ord l'imperi osmanic.

Uffizialmain dat quai anc nagins candidats che pudessan far concurrenza al president per las elecziuns. Dentant sajan ils burgamesters dad Istanbul e da Ankara daventads fitg populars durant la pandemia, er sur ils cunfins da lur citads or.

RTR actualitad 12:00

Artitgels legids il pli savens

Scrollar a sanestra Scrollar a dretga