La procura publica haja ordinà l’arrestaziun pervi ch’ils 14 collavuraturs duajan avair sustegnì organisaziuns terroristicas. Dudesch dad els sajan gia en fermanza, dus auters sajan anc en l’exteriur – uschia il schef da la suprastanza, Akin Atalay.
L’anteriur schef-redactur, Can Dündar, che viva en Germania en l’exil, vegn tschertgà per incumbensa d’investigaziun. La chasa da Dündar ad Istanbul saja vegnida tschertgada. Tranter ils arrestads è era l’advocat da Dündar, Bülent Utku. Utku è al medem mument en la suprastanza da «Cumhurriyet».
Tenor la communicaziun da la procura publica tirca, che «Cumhurriyet» ha publitgà sez, rinfatscha la giustia a la gasetta d'avair sustegnì la partida da lavur curda PKK ed il moviment dal predicatur Fetullah Güllen. La regenza tirca rinfatscha a Güllen d'esser responsabel per l'emprova da putsch malgartegiada la mitad da fanadur.
RR novitads 12:00