Siglir tar il cuntegn
Inhalt

Exteriur Tirchia: Arrestaziuns cuntinueschan

Suenter la tentativa d'in culp da stadi en la Tirchia s'augmenta il dumber d'arrestaziuns adina pli fitg.

Predicatur.
Legenda: La regenza tirca fa responsabel il predicatur exilià Fethullah Gülen per l'emprova da putsch. El refusescha questas renfatschas cun vehemenza. Reuters

Tenor il minister da l'intern èn fin ussa arrestads passa 18'000 persunas suspectadas d'avair colliaziuns cun il moviment da Gülen. Cunter bunamain 10'000 da questas persunas dettia in cumond d'arrest.

Per impedir che persunas suspectadas fugian en l'exteriur èn passa 49'000 pass vegnids declerads nunvalaivels. La regenza tirca inculpescha il predicatur Fethullah Gülen d'esser responsabel per l'emprova da putsch dals 15 da fanadur.

Suspendì trais generals

Ultra da quai ha la regenza tirca ha dispensà trais generals da la lavur tar la NATO. Sco l’agentura da novitads tudestga dpa rapportà sajan ils dus commembers tircs en il stab da l’engaschi en l’Afganistan pertutgads da las mesiras. Il terz general saja vegni arrestà en il quartier principal da l'armada ad Izmir.

L’allianza militara NATO n’è betg s’exprimida sur da las persunalias, in pledader da la NATO ha dentant confermà che la regenza tirca haja infurmà sur da midadas da persunal. Sin engaschis da la NATO han las midadas naginas consequenzas.

RR novitads 18:00