Suenter l'attatga cun bumba ad Ankara cuntinuescha la Tirchia las acziuns cunter pussaivels involvids. En l'entir pajais haja dà passa 400 acziuns cunter gruppaziuns da la partida curda PKK, ha il minister da l'intern tirc scrit sin la plattafurma X. La polizia haja arrestà 55 persunas suspectadas en 16 provinzas. La dumengia avevan duas persunas laschà explodir ina bumba datiers da bajetgs da la regenza ad Ankara. Omadus attentaders èn morts dus policists èn vegnids blessads.
Explosiun datiers da parlament ad Ankara
En la chapitala tirca, Ankara, hai dà ina ferma explosiun dumengia a bun'ura – datiers dal parlament che leva avrir en il decurs dal di sia nova sesida da lavur. Quai rapporta l'agentura da novitads AFP. Il ministeri da l'intern discurra dad in'attatga cun bumbas tar l'entrada dal ministeri. Il center d'Ankara è vegnì bloccà.
Sin la plattafurma da novitad curtas X communitgescha il minister da l'intern, Ali Yerlikaya, che dus terrorist sajan stads participads. In haja siglientà sasez, l'auter saja vegnì «neutralisà». Dus policists sajan vegnids blessads levamain. Numerus autos da polizia ed ambulanzas sajan en acziun.