Siglir tar il cuntegn

Header

cuntegn

Exteriur Tirchia cuntinua curs da collisiun pervi da votaziun naziunala

La Tirchia procura vinavant per battibugls cun sia tura da propaganda per ina votaziun naziunala: Il president tirc Erdogan smanatscha cun vendetga, pervi ch'ils Pajais Bass n'han betg laschà platgar l’aviun dal minister da l’exteriur tirc. Sch'el vegn a discurrer en Svizra n'è anc betg cler.

Per la Confederaziun na datti nagin motiv d’impedir al minister da l’exteriur tirc Mevlüt Cavusoglu da discurrer in occasiun dad in'eventuala occurrenza en Svizra. Quai ha ditg ina da las top-diplomatas dal Departament federal d’affars exteriurs, Pascale Baeriswyl, a la Samstagsrundschau dal radio SRF.

Svizra: Libertad d'opiniun per tuts, di la Confederaziun

En princip valia la libertad d’opiniun ha ditg Baeriswyl. I saja però era cler ch’in organisatur stoppia sclerir dumondas da segirezza cun la Confederaziun e las autoritads chantunalas.

Anc betg sclerì è, nua e sche insumma ch’il minister da l’exteriur Cavusoglu vegn a tegnair in pled per far recloma per la midada da la constituziun tirca n’è anc betg cler. L’hotel Hilton ad Opfikon sper Turitg aveva ditg giu in'occurrenza cun el per motivs da segirezza.

In'autra occurrenza da la regenza tirca AKP ad Opfikon (ZH) aveva gia lieu. La è stà da la partida il politicher tirc Hursit Yildirim. L'occurrrenza saja stada privata, uschia che la polizia na saja betg stada involvida, è vegnì comunitgà davart dals organisaturs. Tar els sa tracta tenor l'agentura da novitads svizra da l'uniun svizra dad impressaris tircs, Müsiad.

Avant avevan las citads da Turitg e da Spreitenbach scumandà ina tal’occurrenza per motivs da segirezza.

Tirchia vs. Pajais Bass: «Relict dal naziunalsocialissem», di Erdogan

En ils Pajais Bass cuntinuescha la dispita pervi dad ina occurrenza da propaganda tirca en ils Pajais Bass a Rotterdam cuntinuescha. Da scumandar al minister da l’exteiur tirc da vegnir en il pajais saja in «relict dal naziunalsocialissem» sa vilenta il president tirc Erdogan ad in’occurrenza ad Istanbul.

Erdogan smanatscha cun vendetga, magari cun in scumond da platgar per aviuns dals Pajais Bass en Tirchia.

Suenter che la citad da Rotterdam aveva scumandà al minister da l’exteriur tirc Cavusoglu, da discurrer ad in’occurrenza, ha reagì la regenza a Den Haag cun til retrair il permis dad entrar en il pajais. Il minister tirc vuleva far propaganda per ina votaziun naziunala en Tirchia. A quella han da decider ils Tircs sch’els vulan dar dapli pussanza a lur president Erdogan.

RR novitads 11:00+

Artitgels legids il pli savens