Suenter il putsch betg reussì duai la garda dal president tirc vegnir schliada si. La truppa d’elita na vegnia betg pli duvrada . Quai ha declerà il schef da regenza tirc Binali Yildirim en la televisiun.
Gia venderdi han las autoritads decretà cumonds d’arrest encunter 300 commembers da la garda. Tenor l’emettur CNN Türk sajan gia passa 280 commembers vegnids arrestads. En tut dumbra la garda dal president radund 2’500 commembers.
Partida procurda HDP demonstrescha ad Istanbul
Millis da demonstrants procurds han la sonda demonstrà tant cunter l’emprova da putsch sco er encunter la reacziun dal president Recep Tayyip Erdogan. Appellà a la demonstraziun ha la partida procurda HDP. Il schef da la partida, Selahattin Demirtas, ha crititgà la decisiun dad Erdogan da pudair tegnair en arrest persunas suspectadas fin a 30 dis senza accusaziun.
I saja correct da cumbatter il putsch. Dentant chaschunian las mesiras prendidas be anc dapli malgiustia, ha ditg Demirtas. El ha appellà da sa distanziar da gritta, odi e polarisaziun.
RR novitads 06:00
