Siglir tar il cuntegn

Header

cuntegn

Exteriur Tirchia: Manaders da HDP en arrest – explosiun en il sidost

La polizia ha arrestà ils dus schefs da la partida procurda, Selahattin Demirtas e Figen Yüksekdag. Curt suenter hai dà ina greva explosiun a Diyarbakir cun almain 8 unfredas e passa 100 blessads. L'IS è sa declerà responsabel per l'attatga.

Sco pliras agenturas rapportan la sonda è l'IS sa declerà responsabel per l'attatga da venderdi cun 8 morts e 100 blessads a Diyarbakir.

Dus politichers da la HPD en arrest

Ils dus politichers sajan vegnids arrestads en connex cun in'acziun d'anti-terror la notg passada. I sa tractia da Selahattin Demirtas e Figen Yüksekdag. Quai rapporta l'emettur statal TRT.

Demirtas e Yüksekdag tutgan tar ils numerus deputads da la HDP en il parlament tirc als quals il president Recep Tayip Erdogan aveva retratg l'immunitad il matg da quest onn. Erdogan vesa la HDP sco portavusch da la partida da lavur curda PKK ch'è dapi onns scumandada en la Tirchia.

Greva explosiun a Diyarbakir

En il sidost da la Tirchia hai dà ina greva explosiun davant in bajetg da la polizia en la citad da Diyarbakir, il center dals Curds. Almain otg persunas sajan mortas, passa 100 ulteriuras persunas sajan vegnidas blessadas. Quai communitgeschan las autoritads localas. La raschun da l’explosiun n’è anc betg enconuschenta. Il primminister tirc Binali Yildirim fa responsabel la partida da lavurers scumandada PKK per l'attatga.L'explosiun è capitada be paucas uras suenter che la polizia aveva arrestà ils dus schefs da la partida procurda HDP durant ina razzia da notg.

Nagin internet

En ils territoris dals Curds en il sidost dal pajais ed en ulteriuras regiuns han las autoritads tircas bloccà l’access a las medias socialas la notg sin venderdi. Ad Istanbul è l’access a l’internet sur il telefonin stà bloccà temporarmain.

RR novitads 06:00

Artitgels legids il pli savens