Siglir tar il cuntegn

Header

Bandiera da la Tirchia cun il simbol da Twitter
Legenda: Il servetsch da Twitter vegn bloccà da la regenza tirca. Reuters
cuntegn

Exteriur Tirchia senza Youtube e Twitter

En Tirchia han las autoritads bloccà l'access al servetsch da novitads curtas Twitter ed al portal da videos Youtube. Quai ha confermà il manader da l’Uffizi d’infurmaziuns da las autoritads tircas envers la gasetta tirca Hürriyet.

Il motiv è che l’emna passada eran vegni publitgà maletgs dal rapinament e mazzament d’in procuratur public tirc. La procura publica generala ha sinaquai pretendì ina bloccada da las medias socialas.

Er la rait sociala da Facebook è stada offline per in mument. Suenter ch'ils maletgs èn però vegnids allontanads han las autoritads tircas puspè dà liber l'access.

Bloccà internet gia avant in onn

Gia il mars da l’onn passà avevan las autoritads bloccà Twitter e Youtube. Lura eran cumparì reproschas da corrupziun cunter commembers da la partida AKP dal president tirc Recep Tayyip Erdogan.

RR novitads 16:00

Artitgels legids il pli savens

Scrollar a sanestra Scrollar a dretga