Siglir tar il cuntegn

Header

cuntegn

Exteriur Tissientà in pèr entras Nowitschok

En il sid da l'Engalterra è in pèr vegnì tissientà entras il tissi da cumbat Nowitschok, quatter mais suenter l'attatga cun il medem tissi sin l'anteriur spiun russ Sergej Skripal e sia figlia. Quai ha communitgà Scotland Yard.

Il manader da l'autoritad anti-terror britannica ha ditg ch'i na dettia nagins indizis ch'il pèr saja stà en la mira cun intenziun. I saja plitost probabel ch'il pèr da 44 e 45 onns pudess esser vegnì en contact nunvulidamain cun il recipient che cuntegneva il tissi da cumbat Nowitschok. Quel n'avevan ins numnadamain betg chattà enfin ussa. Il pèr pertutgà vegn tractà en il medem ospital sco l'anteriur agent dubel Skripal.

Nowitschok - tissi mortal e grev da cumprovar

Avrir la box Serrar la box
  • Nowitschok (per tudestg Neuling) vala sco in dals tissis da cumbat ils pli mortals.
  • Perscrutaders russ han sviluppà la seria da novs tissis da cumbat ils onns 1970 e 80 en il secret per guntgir scumonds internaziunals. Mo paucs detagls èn enconuschents.
  • Propabel consista Nowitschok or da duas componentas betg toxicas che sviluppeschan lur privel mortal pir cun maschadar.
  • Savens vegn il tissi applitgà en furma d'ina pulvra extremamain fina e vegn en il corp sur la pel u las vias respiratoricas. El maina a la mort entras stenscher, il pli savens aifer intginas uras.
  • Il tissi è grev da cumprovar e las schanzas da surviver èn pitschnas. Er cuntratissis sco per exempel Atropin n'han strusch in effect cunter Nowitschok.

La dunna saja collabada l'emprim, pli tard han ils medis era purtà l'um en l'ospital. Ils scienziads examineschan sch'il tissi saja identic cun la substanza ch'è vegnida duvrada tar Skripal.

Tar la populaziun chaschuna quest nov cas malsegirtad, en spezial la dumonda co e nua che la contaminaziun è capitada.

RR novitads 07:00

Artitgels legids il pli savens