Imre Kertész è naschì il 1929 a Budapest ed è creschì si en ina famiglia gidieua. Il 1944 era el vegnì deportà ad Auschwitz e Buchenwald e liberà or dal champ da concentraziun suenter la fin da la guerra. Ils proxims onns ha el lavurà sco redactur, autur da tocs divertents per il teater e sco translatur d’ovras da Nietzsche e Wittgenstein.
Premi Nobel per «Roman eines Schicksallosen»
Las experientschas da la schoa n’han betg pli dà ruaus ad el. Dal 1960 fin 1973 ha Kertész lavurà vi da si’ovra principala «Roman eines Schicksallosen». Il 2002 ha el survegnì il Premi Nobel per litteratura. Quatter onns suenter è suandà il premi «Preis für Verdienste um die deutsche und europäische Verständigung der Deutschen Gesellschaft».
En sias ovras è Kertész sa fatschentà cun il surviver en sistems totalitars e cun il fenomen dal spustament aifer la societad suenter la vieuta. Il 2012 è el returnà a Budapest. Da quest temp pativa el gia dapi plirs onns da la malsogna da Parkinson. Il 2014 ha el survegnì la medaglia da Son Steffan, la pli auta distincziun da l’Ungaria.
Uss è Imre Kertész mort a Budapest en la vegliadetgna da 86 onns.
RR novitads 11:00