La Jordania èn in dals pajas ch’ha prendì si ils fugitivs or da la Siria, nua ch’i regia guerra gia dapi bun 4 onns. «Ils bunamain 700'000 fugitivs sirians en la Jordania han stuì ir atras situaziuns orriblas», di Ladina Spiess, redactura da SRF1, che ha visità famiglias da fugitivs ch'èn en la Jordania.
Els èn traumatisads da la guerra, han gì ina fugia plain strapatschs e survivan ussa cun il minimum.
La gronda part dals fugitivs viva en il camp Zatari. Las medias n'han dentant nagin access en quel. La situaziun saja dentant precara. Il rest dals fugitivs abiteschia en pitschnas abitaziuns fittadas: savens l'entira famiglia mo en ina stanza. «En la publicitad na vesan ins betg ils fugitivs», di Spiess. «Els n'han nagina lavur, nagins daners, ed uschia era nagina pussaivladad da cumprar urden. Els restan tranter els.»
Fugia privlusa
Avant la guerra viveva la famiglia che Ladina Spiess ha visità ina bella vita. Ella possedeva in puresser cun vatgas, nursas, giaglinas e bler terren per cultivar plantas. Las bumbas e granatas èn dentant vegnidas adina pli datiers al puresser, uschia che la famiglia ha stuì currer per sia vita.
En la Siria ha ella laschà la gronda part da ses possess. Il bab, la mamma ed ils 4 uffants han prendì daners, bischutaria e quai ch'els pudevan purtar.
In cuntrabandist da persunas ha transportà la famiglia ensemen cun 400 ulteriurs fugitivs en in camiun. Quel ha dentant giu in incap tecnic, ils fugitivs eran a ferm en il desert. Rebels sirians han fatg smanatschas e pretendì ch'els svaneschian immediat. Cun in auter camiun èn ils fugitivs lura vegnids fin a 20 kilometers avant il cunfin da la Jordania. Davent da là han els dentant stuì ir a pe.
Tschertgar mangiativas en il rument
Oz viva la famiglia da 6 persunas en ina stanza. Els possedan mattas finas per durmir ed intgins plimatschs per seser. «Quai na pon ins dentant betg numnar ina abitaziun», di Ladina Spiess. «Las paraids èn vidas, la colur dettia davent, las fanestras n'han nagins sumbrivals.»
Ils daners che la famiglia aveva prendì cun ella da la Siria èn davent. Ussa è la famiglia visada sin l'agid da las ovras caritativas. Ella survegn bons per mangiativas, resti e chalzers. Dentant n'è quai betg avunda. «Il fegl da 20 onns va mintga di a tschertgar mangiativas en il rument», raquinta la mamma a Ladina Spiess.
Cun ils bons da la Caritas po la famiglia cumprar vivonda da basa: pia farina, zutger, legums e charn. Radund 85.- francs ha ella a disposiziun per mais e sto perquai desister da bler.
Senza l'agid d'ovras caritativas internaziunalas èn ils fugitivs pers.
En curt va il program da la Caritas a la fin, perquai ch'ils daners mancan. Uschia spera la famiglia sin agid d'ina autra ovra caritativa. «Senza quest agid d'ovras caritativas internaziunalas èn ils fugitivs pers», è Ladina Spiess persvasa. «Ils umans moran lura da la fom.»
Fugitivs èn engraziaivels per mintga agid
L'agid saja urgentamain necessari. Ils fugitivs sajan nunditg engraziaivels per mintga agid, di Ladina Spiess. Uschia haja la mamma da la famiglia engrazià ad ella per ses engaschi ed explicitamain era per las donaziuns da la populaziun svizra.
Gidar ils fugitivs sirians pon ins cun il conto da schec postal da la Chadaina da fortuna: 10-15'000-6 cun inditgar «Siria».
