American Airlines stritga l'aviun Boeing 737 Max pli ditg che planisà da ses urari da sgol. La societad aviatica americana na prevesia fin ils 3 da settember nagins sgols cun quest tip d'aviun, ha communitgà l'interpresa. Fin uss planiseva l'iterpresa da puspè laschar sgular ils aviuns a partir dals 19 d'avust.
Per American Airlines ch'è ina da las pli grondas societads aviaticas en l'USA munta quai che quest tip d'aviun croda ora per las entiras vacanzas da stad. Mintga di sto l'interpresa pervi dal Boeing 737 Max stritgar radund 115 sgols. Actualmain posseda American Airlines 24 aviuns da quest tip ed ha empustà ulteriurs 76.
Suenter che dus eroplans Boeing 737 Max èn crudads giu en l'Indonesia e l'Etiopia cun totalmain 346 morts ston dapi il mars tut ils eroplans da quest tip star per terra sin l'entir mund.
RR novitads 07:00
