Easyjet, la societad aviatica britannica per sgols bunmartgads, vul puspè porscher emprims sgols a partir dals 15 da zercladur.
Latiers tutgian surtut destinaziuns aifer la Gronda Britannia, sco quai che l'interpresa communitgescha.
Sgular en temp da corona
Textbox aufklappenTextbox zuklappen
Cun mascras e plazzas libras – uschia sa mettan las autoritads da l'UE avant il sgular en temp da corona. Ellas han preschentà las directivas correspundentas. En quellas vegn cusseglià a tut ils passagiers e la crew da metter si mascras da protecziun cura ch'ellas arrivan a l'eroport e da pir prender giu quellas a la destinaziun. Excepziuns sajan pussaivlas per uffants sut 6 onns. En l'aviun duai vegnir laschà liber in plaz per retscha u mintga segunda retscha. Il service stoppia vegnir reducì sin il necessari.
L'associaziun aviatica internaziunala refusa prescripziuns da distanza a bord, perquai ch'ils tickets vegnissan uschia marcantamain pli chars.
Tut en tut vegnia puspè sgulà sin 22 eroports, tranter quels London-Gatwick, Edinburgh, Glasgow u Belfast. Il schef da Easyjet, Johan Lundgren, ha discurrì da pass pitschens e precauts. La societad aviatica ha annunzià ulteriuras mesiras da protecziun pervia da la pandemia. Tranter auter duain passagiers e persunal purtar mascras.
