La demonstraziun dal Ku-Klux-Klan e da l'uschenumnà moviment All-right è sa drizzada cunter las autoritads da Charlottesville. Lezza vul numnadamain disfar in monument istoric dal general da la guerra civila (1861-1865), Robert E. Lee.
Ils cravals hai dà cura che plirs tschient extremists da dretga stevan visavi ad aderents da gruppas antifaschisticas. Omaduas varts sajan stadas armadas cun fista, buttiglias ed auter. Las autoritads han clamà or il stadi d'urgenza.
Las autoritads da la citad en il stadi federativ da Virginia discurran da trais morts ed almain 35 blessads. Ina dunna è morta cura ch'in auto è charrà sco i para cun intenziun en ina fulla da glieud. A l'ur da la demonstraziun è crudà giu in helicopter da la polizia.
Reacziun dal president dispitaivla
Il president dals Stadis Unids Donald Trump è vegni crititgà tant dals democrats sco dals republicans ch’el na saja betg sa distanzià cler avunda da la violenza tras extremists da la dretga en la citad da Charlottesville en ils Stadis Unids. Reacziuns pli positivas hai entant dà per il tweet da ses antecessur en uffizi, Barack Obama.
RR novitads 06:00+