Siglir tar il cuntegn

Header

cuntegn

Exteriur Transacziuns da migrants en lur patria èn s'augmentadas

Anc maina han migrantas e migrants tramess tants daners en lur patria sco l'onn passà. Tenor la banca mundiala èn quai stads 466 milliardas dollars, in augment dad 8,5%. Per quest onn saja anc ina giada da quintar cun 4% dapli.

Ils pli gronds augments dettia cunzunt da pajaments da l'Europa, la Russia e dals Stadis Unids. Cun 69 milliardas dollars èn ils pli blers daners ids en l'India, suandà da la China cun 64 milliardas dollars, las Filippinas cun 33 milliardas dollars, Mexico cun 31 milliardas dollars, Nigeria cun 22 milliardas dollars ed Egipta cun 20 milliardas dollars.

Transacziuns èn memia charas

Ils transfers da daners, ch'èn per blers stadis in factur economic decisiv, èn tenor la banca mundiala memia chars. En l'emprim quartal 2018 han ins stuì pajar sin ina summa da 200 dollars, 7,1% da la summa sco taxa. Il pli char èsi stà en ils stadis africans en il sid da la Sahara, cun 9,4%.

La banca mundiala supplitgescha perquai stadis, instituziuns da finanzas ed organisaziuns d'agid da sa metter en per pli bass custs, per che las famiglias survgnian dapli daners, uschia Dilip Ratha, l'autur principal dal rapport. Ils stadis duajan perquai simplifitgar la procedura per las transacziuns cun, per exempel duvrar tecnologia pli effizienta.

RR novitads 12:00

Artitgels legids il pli savens