Siglir tar il cuntegn
Inhalt

Exteriur Trump relascha Jeff Sessions

In di suenter las elecziuns americanas èn democrats e republicans gia en dispita: Ils democrats crititgeschan la decisiun da Donald Trump da relaschar il minister da giustia Jeff Sessions.

Purtret da Jeff Sessions.
Legenda: Il minister da giustia, Jeff Sessions sto ir. Keystone

Il president american, Donald Trump veglia uschia impedir las inquisiziuns en l'affera cun la Russia, crititgescha la scheffa da fracziun dals democrats Nancy Pelosi sin Twitter.

Adina puspè aveva Trump crititgà Sessions e pretendì ch'el interrumpia las inquisiziuns davart l'influenza da la Russia sin las elecziuns dal presidi d'avant dus onns. Ad interim maina il schef dal stab Matthew Whitaker il ministeri da giustia. Whitaker è in aderent da Trump ed è enconuschent sco criticher da las investigaziuns en cas da la Russia. Tgi che duai lura definitivamain manar il post, vul Trump communitgar pli tard.

Confruntaziun cun schurnalists

Purtet da Trump che sevila si per Acosta.
Legenda: Trump ha ditg si per Acosta ch'el saja ina schleta persuna e ch'el na duess betg lavurar per CNN. Keystone

Donald Trump va dentant era sin confruntaziun cun ils schurnalists. Ad in reporter da CNN ha la Chas'alva retratg l'accreditaziun perquai ch'el saja sa depurtà a moda inacceptabla. Jim Acosta aveva piglià ord maun il microfon ad ina collavuratura da la Chas'alva durant ina conferenza da pressa. CNN dentant è da l'avis che la raschun sajan sias dumondas criticas davart la politica a migraziun da Donald Trump.

RR novitads 06:00