- La schliaziun provisorica duai valair fin ils 15 da favrer.
- Donald Trump vul tant pli spert suttascriver ina lescha per puspè avrir ils posts da la regenza per las proximas 3 emnas.
- In comité da republicans e democrats duai sa cunvegnir en chaussa protecziun da cunfin.
- Na datti nagina schliaziun definitiva vul Trump tut tenor proclamar il stadi d'urgenza.
La schliaziun provisorica valia fin ils 15 da favrer. En quest temp vegnia in comité da republicans e democrats a discurrer davart la finanziaziun dal mir da cunfin tar il Mexico. Na dettia fin lura nagina schliaziun definitiva dettia puspè in «shutdown» u ch'el vegnia a proclamar il stadi d'urgenza, uschia Trump.
Consequenzas adina pli gravantas
Ordavant eran sa pegiurads ils effects dal pli lung shudown da l'istorgia americana da fin qua. A New York e Philadelphia per exempel èn vegnids stritgads plirs tschients sgols u ch'els han gì retard perquai ch'i mancava il persunal.
Pervia da la bloccada dal budget na survegnan tschient millis d'emploiads dal stadi betg pli lur pajas dapi radund tschintg emnas.
RR novitads 21:00
