Il president american Donald Trump ha incumbensà l'agenzia astronautica NASA da puspè trametter missiuns spazialas equipadas sin la glina. Quai ha ditg Trump a chaschun d'ina ceremonia en la Chas'alva. Trump ha suttascrit l'incumbensa a la commemoraziun da l'ultima missiun spaziala sin la glina avant 45 onns – l’Apollo 17 l’onn 1972. Quai ha il president fatg en preschientscha da Buzz Aldrin, in dals trais emprims astronauts americans ch'èn stads il 1969 sin la glina.
Basa per missiuns sin il mars
Sin la glina duai alura vegnì endrizzar ina basa per far missiun sin il mars. Il president american ha suttascrit ina directiva correspundenta che fixescha quella finamira sco finamira dalla politica americana. In spazi da temp u in budget per quella finamira ambiziunada n’è dentant betg vegnida numnada.
RR novitads 06:00