Tschains directiv - Stadis Unids cumbattan la chareschia
En ils Stadis Unids sforza l'auta rata d'inflaziun l'institut d'emissiun FED da reagir e d’augmentar il tschains directiv uschè fitg sco dapi 28 onns betg pli.
La FED augmenta il tschains directiv gist per 0,75 puncts procentuals. Uschia è la marscha da tschains tranter 1,5 fin 1,75%. Quai ha communitgà il schef da l’institut d’emissiun american, Jerome Powell. La finamira saja da sbassar la rata d’inflaziun a lunga vista sin 2%.
La FED è sut grond squitsch, damai che la chareschia è uschè auta sco dapi decennis betg pli. Il matg ha l’inflaziun muntà a 8,6%. La FED quinta che la chareschia annuala vegnia ad esser anc pli auta che pensà avant trais mais. Perquai sajan probabel ulteriurs augments dal tschains directiv necessaris.
L'influenza dal tschains directiv
Avrir la boxSerrar la box
In augment dal tschains directiv fa vegnir pli chars ils credits e fraina uschia la dumonda. Quai gida da sbassar la rata d’inflaziun. Il medem mument fraina quai dentant er la creschia economica.