Tschintg dis ultimatum per la Catalugna

La regenza spagnola dat in ultimatum da tschintg dis a la regenza catalana per prender posiziun. Questa dumonda stoppia vegnir scleria l'emprim, ha ditg il primminister Mariano Rajoy suenter ina sesida d’urgenza dal cabinet la mesemna a Madrid.

Rajoy discurra en il parlament. Bild in Lightbox öffnen.

Legenda da maletgs: Independenza gea u na – il primminister spagnol Mariano Rajoy vul uss ina resposta dal schef da la regenza catalana. Keystone

Al president catalan Carles Puigdemont scurra il temp. Sch’el na sa decida fin la gievgia proxima betg da desister da l’independenza, piglia en maun la Spogna il destin da la Catalugna. Quai vul dir: Il primminister spagnol Rajoy piglia a Puigdemont l’uffizi ed a la Catalugna l’autonomia, quai almain ad interim.

Sursiglir cuntegn supplementar

Art. 155 & art. 116

Quests artitgels èn basa per in agir spagnol cun maun dir: Art. 155 permetta a primminister Rajoy da suspender l’autonomia catalana. Necessari perquai è il «gea» dal senat spagnol (maioritad absoluta Rajoy). Art. 116 permetta da proclamar il stadi d’excepziun en ina part dal territori spagnol. Perquai vuli il «gea» dal congress (minoritad Rajoy).

Spogna fa dus ultimatums a la Catalugna

Quai è l’annunzia da la Spagna suenter la sesida d’urgenza la mesemna saira. La Spagna haja dentant anc fatg in segund ultimatum, rapportan pliras medias sa referind sin infurmaziuns uffizialas. Quel ulteriur ultimatum valia fin il proxim glindesdi: Fin las 10:00 haja Puigdemont da respunder a la Spagna, sch’el haja uss declerà l’independenza u betg.

Il schef da la regenza catalana, Carles Puigdemont, aveva suttascrit ina decleraziun d’independenza mardi saira – ma immediat puspè suspendì quella.

Puigdemont na vegn betg a dar suenter

Tenor ils observaders da differentas varts saja plitost betg probabel, ch’il schef da la regenza catalana vegni a dar suenter a las pretensiuns da Madrid. Per si’atgna glieud fiss el en cas cuntrari in traditur.

En Catalugna datti dentant er sustegn per la lingia da Madrid: Il manader da l’opposiziun socialistica en Catalugna Pedro Sánchez sustegna al primminister spagnol Rajoy.

RR novitads 06:00