Tschintgavla runda da tractativas tar Brexit fa naufragi

Danovamain na vegnan l’UE è la Gronda Britannia betg vinavant en lur discurs tar il Brexit: Uschia va a fin l’emprima etappa da las tractativas senza avair cuntanschì la finamira. Quai rapportan las agenturas da novitads, citond il schef-contractader da l’UE Michel Barnier.

omadus al pult Bild in Lightbox öffnen.

Legenda da maletgs: Il secretari statal britannic per il Brexit, David Davis (san.) ed il schef-contractader da l'UE per il Brexit, Miche... Keystone

Actualmain na dettia quai nagin progress che giustifitgass da cumenzar cun la segunda fasa da tractativas, uschia Barnier la gievgia envers las medias.

A la fin da la tschintgavla runda da discurs, ma betg rivà vinavant

L’atmosfera dals discurs saja bain «constructiva», tuttina na dettia quai «nagins gronds pass vinavant».

Perquai na possia il schef-contractader da l’UE Michel Barnier betg recumandar a l’inscunter suprem da l’UE l’emna proxima, da cumenzar cun la segunda fasa dals discurs. En quella duai vegnir discutà da las relaziuns futuras. L’UE speria, che l’emprima fasa possia vegnir terminada enfin il december.

Brexit previs per la fin da mars 2019

La Gronda Britannia less sortir il mars 2019 da l’UE. Oriundamain vuleva l’UE sclerir las dumondas impurtantas tar il Brexit fin la mesadad d’october e discutar suenter davart las relaziuns futuras. Quai n’ha dentant betg funcziunà.

Rumpatesta fan las finanzas

Da discutar dattan tranter auter ils raps. Tenor funtaunas inuffizialas sa tracti da radund 100 milliardas euro che l’UE pretenda da la Gronda Britannia. Quai per conresponsabladad per obligaziuns che l'UE saja ida en durant ils 40 onns che la Gronda Britannia è stada commembra.

RR novitads 12:00