Mintgin stoppia uss surpigliar sia responsabladad, ha Tsipras ditg en in'intervista cun la televisiun statala greca.
Il parlament grec debattescha damaun davart in emprim pachet da spargn e da refurmas. In gea dovri per che las tractativas cun ils crediturs davart in terz pachet d'agid possian insumma cumenzar.
Ina cunvegna sut pressiun
En l'intervista ha il primminister Alexis Tsipras era defendì la cunvegna cun ils crediturs. Il medem mument ha el dentant crititgà cun vehemenza, co ins haja cuntanschì la cunvegna.
La notg da l'inscunter da l'euro a Brüssel saja stada nauscha per l'Europa. Stadis cun paisa hajan fatg pressiun sin la Grezia, per vegnir a la cunvegna. Questa via n'onureschia betg la tradiziun da l'Europa.
Aspects positivs
La Grezia haja dentant era cuntanschì insatge, ha Tsipras manegià. Anc quest onn vegnia discutà da restructurar ils daivets, ed i dettia ina discussiun davart in program d’investiziun da 35 milliardas euros. Sche questas mesiras vegnian realisadas, pudessan ellas furmar las premissas per che la Grezia prospereschia.
Vinavant bancas serradas
En la medema intervista ha Tsipras era ditg, che las bancas grecas pudessan restar serradas almain anc per in mais.
RR Novitads 23:00