Quai ha declerà Tsipras en in'intervista da la televisiun. Oz avess il pajas da pajar enavos in'impurtanta rata da 1,6 miliardas euros al Fond monetar internaziunal. Tsipras ha però annunzià ch'Athen na vegnia betg a far quai. Cunquai ruschna la Grezia en il bancrut.
Era Varoufakis smanatscha
Entant ha il minister da finanzas Yanis Varoufakis smanatschà cun pass giuridics sche la gruppa da l'euro excluda la Grezia da la zona monetara. Ils contracts da l'Uniun europeica na cuntegnian naginas reglas per ina sortida da l'euro ed els vegnian a sa dustar cunter ina tala decisiun ha ditg Varoufakis envers la gasetta britannica «Daily Telegraph».
La commembranza da la Grezia na saja betg da negoziar. La regenza ad Athen laschia perquai sa cussegliar il mument en chaussa.
RR novitads 6:00