Siglir tar il cuntegn
cuntegn

Exteriur Tunesia - 10 unfrendas èn identifitgadas

Suenter l'attatga da terror sin in hotel en la Tunesia han ins identifitgà fin uss 10 da las 38 unfrendas.

baras a la riva
Legenda: 10 da las unfrendas da l'attatga da terror èn vegnidas identifitgadas. Keystone

I sa tractia dad 8 persunas da la Gronda Britannia, ina dunna da la Belgia ed in um da la Germania. Quai ha annunzià il ministeri da sanadad. Ulteriuras 39 persunas sajan vegnidas blessadas tar l'attatga en il lieu da vacanzas Sousse, surtut Brits Tudestgs e Beltgs.

Entant ha il primminister brit David Cameron avertì ils conburgais che bleras da las unfrendas sajan da la Gronda Britannia. Il Departament federal d’affars exteriurs sclerescha vinavant sch’i dat era Svizzers tranter las unfrendas.

SI surpiglia responsabladad per attatga

En ina communicaziun da Twitter betg verifitgada han aderents da la milissa da terrur Stadi islamic surpiglià la responsabladad per l’attatga. Tschients turists han entant bandunà la Tunesia. Lur organisaturs da viadis hajan cusseglià ad els da turnar a chasa.

Mesiras cunter il terrur

La regenza da la Tunesia ha decidì pliras mesiras cunter il terrur. Ella vul serrar radund 80 moscheas, controllar uniuns e partidas e schliar quellas ch'èn suspectusas. Ultra da quai vul la Tunesia plazzar dapli schuldads avant instituziuns.

ONU e Stadis Unids condemneschan attatgas

Las Naziuns Unidas ed ils Stadis Unids da l'America han condemnà rigurusamain las attatgas terroristicas en la Tunesia, il Kuwait e la Frantscha. Il secretari general da l'ONU Ban Ki Moon ha ditg che quests acts sgarschaivels na tschessian betg la resolutadad da la cuminanza internaziunala da cumbatter il terrorissem. Cuntrari. Ils Stadis Unids han fatg amogna lur agid als stadis pertutgads. Venderdi eran passa 60 persunas vegnidas mazzadas tar attatgas en trais pajais.

RR novitads 15:00