Il Danemarc scusseglia uss era a ses burgais da far viadis en Svizra, l'Austria, il Portugal, l'Ungaria ed ils Pajas Bass. Il motiv persuenter èn il dumber creschent d'infecziuns dal coronavirus en ils tschintg pajais. Quai ha communitgà il ministeri da l'exteriur danais. Uschia scusseglia el entant da viagiar en ina entira retscha da pajais ord il spazi da Schengen.
Il Danemarc actualisescha sias directivas da viadi mintga gievgia. El scusseglia da far viadis betg necessaris en tals pajais, nua ch'i dat aifer in emna passa 30 infecziuns novas sin 100'000 abitants. Sch'ins turna d'in da tals pajais en il Danemarc èsi da restar durant 14 dis a chasa.
A l'entschatta da la crisa da corona il mars, aveva il Danemarc decidì mesiras strictas ed uschia gì relativamain svelt sut controlla l'extensiun dal coronavirus. Dapi in temp s'augmenta il dumber da las infecziuns novas puspè. L'ultim temp en spezial en la regiun enturn la chapitala Kopenhagen.