Turissem en l'Austria rumpa tuts records

Il turissem en l’Austria para da far resistenza massiva a l’aura chauda ed a la mancanza da naiv. Entant ch’il turissem en Svizra ha patì fermamain l’enviern passà, noda il pajais vischinant per la stagiun passada (november fin avrigl) in record.

La citad da Vienna en l'Austria sut in tschiel cun nivlas rosa. Avrir maletg en lightbox.

Legenda da maletgs: Nivlas rosa betg mo sur Vienna. En l'entir pajais ha la stagiun d'enviern passada purtà dapli giasts. Keystone

La stagiun d’enviern 2015/16 ha il turissem austriac nudà novs records malgrà las temperaturas memia chaudas e la mancanza da naiv. Uschia èn las pernottaziuns s’augmentadas en l’Austria per 4% sin 68,53 milliuns. Sco l’uffizi da statistica da l’Austria communitgescha saja quai in nov record. Surtut popular tar giasts da l’exteriur eran il Tirol, ma era las citads da Vienna e Salzburg.

Radund 630’000 turists da la Svizra

12,9 milliuns (+5,9%) giasts da l’exteriur ha l’Austria pudì beneventar l’enviern passà. Mintga segund giast da l’exteriur vegn da la Germania (6 milliuns), suandà cun in milliun da l’Ollanda (+8,7%).

Tenor l’uffizi han era 628’400 giasts ord la Svizra ed il Principadi dal Liechtenstein fatg vacanzas d’enviern en l’Austria. Quai è in augment da 5,3%.

RR novitads 17:00