El vegnia a s’inscuntrar ils proxim dis cun il president dals Stadis Unids da l’America, Barack Obama e cun il president da la Russia, Wladimir Putin per instradar ina strategia unitara en la Siria e cunter la gruppaziun terroristica dal Stadi Islamic. «Quai che nus duvrain è in moviment communabel da tut quels, che cumbattan il terrorissem», ha Hollande ditg. La Siria saja daventada tar la pli gronda fabritga da terror dal mund.
La Siria è daventada tar la pli gronda fabritga da terror dal mund.
Dapli attatgas or da l'aria
La Frantscha vegnia a cuntinuar sias attatgas or da l’aria cunter la SI. Ins vegnia gia a trametter la gievgia il portaviuns «Charles de Gaulle» en l’ost da la Mar Mediterrana, uschia ch’ins possia augmentar las attatgas per il traidubel. «Nus duvrain dapli attatgas or da l’aria», ha il president accentuà.
Cun las ultimas attatgas da terror a Paris sajan las valurs da la Frantscha vegnidas attatgadas. «Els èn ina agressiun cunter noss pajais, nossas valurs, nossa giuventetgna e noss stil da viver», ha Hollande ditg. La republica haja gia surventschì autras emprovas.
3 mais stadi d'urgenza
Plinavant ha Hollande annunzià da vulair prolungar il stadi d'urgenza en Frantscha sin 3 mais. Il parlament duai sa fatschentar cun la proposta dal president mesemna proxima. Quai ha Hollande ditg oz als represchentants da las duas chombras parlamentars ch’èn sa radunads en il chasti da Versailles. Plinavant ha el annunzià da vulair stgaffir ils proxims 2 onns 5’000 novas plazzas tar la polizia franzosa.
RR novitads 18:00
