Pir la sonda a bun’ura las 07:00 ha serrà il schef da regenza da las Inslas da Fidschi e president da la conferenza da clima, Frank Bainimarama, la conferenza a Bonn. Oriundamain era prevesì da finir quella gia il venderdi saira.
Tuttina anc chattà la storta tar dumondas da finanziaziun
Il retard saja resultà perquai che novs pajais industrials sco la China e l'India ma er pajais da svilup han pretendì dals pajais industrials empermischuns pli concretas tar l’agid finanzial.
Malgrà ch’ils fossals vegls han puspè sa mussà surtut en la dumonda tgi che ha da pajar quant per salvar il clima, han ils pajais tuttina anc chattà ina cunvegna.
Fondo d’adattaziun da la cunvegna da clima da Paris resta
Ils pajais pli ritgs han cedì e han uschia fatg libra la via per ch’il fondo d’adattaziun – etablì en il protocoll da Kyoto il 1997 – possia vegnir mantegnì er en la cunvegna da clima da Paris. Il fondo d'adattaziun gida a pajais paupers da dumagnar las consequenzas da la midada dal clima.
RR novitads 12:00
