Siglir tar il cuntegn

Exteriur Uber preschenta plans per taxis sgulants

Il servetsch da transport Uber vul en intgins onns era porscher transports en l'aria. Fin il 2020 èn planisads emprims tests.

Uber preschenta plans da pudair porscher en trais onns taxis sgulants.
Legenda: Uber preschenta plans da pudair porscher en trais onns taxis sgulants. Keystone

Il concern Uber ha preschentà ses plans per ina rait da taxis sgulants che duain transportar la glieud en las citads. La tecnica duai vegnir dal producent da helicopters Bell u dal producent d'aviuns Embraer.

Sur la rait vul Uber offrir ports nua ch'ils taxis pon partir e sa tschentar verticalmain. Fin il 2020 èn planisads emprims tests. Ils tests èn planisads en la citad Dallas ed a Dubai. La mira saja da trais onns pli tard pudair cumenzar cun in manaschi commerzial.

Motivs per taxis sgulants

Uber ha gia l'atun passà menziunà lur interess per il traffic aviatic en citads en in palpiri strategic - ussa suonda la realisaziun. La fatschenta argumentscha che las vias sajan adina pli suvens surchargiadas ed il mantegniment vegnia era adina pli chars. Perquai stoppia ins guntgir en l'aria.

Er autras interpresas fan gia patratgs davart la mobilitad en l'aria, tranter auter er Airbus. Ed era la firma chinaisa Ehang vul quest onn far tests cun ina sort drona gigantica. Quels tests vegnan fatgs a Dubai. La drona duai pudair transportar ina persuna.

RR novitads 08:30