Siglir tar il cuntegn
cuntegn

Exteriur Ucraina approvescha dretg da guerra

vista en la sala dal parlament a Kiew, en l'Ucraina
Legenda: Il parlament ha dà suatientscha a la dumonda da ses president. Keystone
  • Il parlament ha approvà il dretg da guerra cun 276 cunter 30 vuschs ch'il president Petro Poroschenko ha decretà.
  • Davent la mesemna duai il dretg valair per 30 dis. El è limità per il territori al cunfin cun la Russia e la Mar Naira.
  • Gia il suentermezdi ha Poroschenko decretà in dretg da guerra, l'emprim per 60 dis.

La Russia e l'Ucraina renfatschan viceversa d'esser la culpa per l'incap en la mar en la stretga da Kertsch. La dumengia ha la marina russa sajetta sin trais bartgas ucranaisas e lura confiscà ellas.

Il servetsch secret russ FSB ha declerà, ch'ils bastiments da guerra confiscads hajan l'emprim drizzà lur chanuns sin ils bastiments russ. Ils sajets d'avertiment sco segn da chalar, n'hajan els betg resguardà.

Seduta urgenta da l'ONU

L'UE e la Nato han appellà als dus pajais a la deescalaziun. La cumissiun da l'UE ha numnà la tenuta da la Russia «inacceptabla» e pretendì da la Russia da laschar liber ils bastiments ucranais.

Ils Stadis Unids han renfatschà a la Russia en il Cussegl da segirezza da l'ONU ina «violaziun scandalusa» da la suveranitad ucranaisa. Las acziuns illegalas da la Russia fetschian nunpussaivel ch'il president american Donald Trump possian crear ina relaziun normala cun la Russia, ha ditg l'ambassadura americana da l'ONU, Nikki Haley a la seduta d'urgenza dal Cussegl da segirtad a New York.

Russia avertescha dad escalaziun

Cun la decisiun dal president ucranais d'activar il dretg da guerra pudess la situaziun escalar. La tensiun en la regiun è anc creschida en l'ost da l'Ucraina. Il Kreml ha communitgà ch'el na saja betg responsabel per ils 23 matros arrestads. Lur destin vegnia decidì avant dretgira, ha declerà in pledader da Moscau.

Ils matros duain vegnir il decurs dal di davant in derschader d'arrest. I vegn spetgà ch'els vegnan en arrest d'inquisiziun perquai ch'els han blessà il cunfin russ. La Russia aveva annectà il 2014 la peninsla ucraina da la Crim.

RR novitads 22:00