En il conflict spera Petro Poroschenko surtut sin il sustegn da la chanceliera tudestga Angela Merkel. Merkel saja ina grond'amia da l'Ucraina. L'onn 2015 haja ella gia ina giada spendrà lur pajais cun las contractivas da Minsk. L'Ucraina speria ch'ella ed ils auters alliads gidian er anc ina giada il pajais, ha ditg Poroschenko.
Il president russ, Wladimir Putin veglia, sco quai che Poroschenko pretenda, puspè enavos il reginavel vegl da la Russia e stendia perquai sia bratscha suenter l'entira Ucraina.
Sco imperatur russ, sco quai ch'el [Wladimir Putin] vesa sasez, na po el betg funcziunar senza l'Ucraina. El vesa nus sco colonia.
Er bastiments tudestgs èn bloccads
En vista a «l'aggressiun russa enorma» pretenda Poroschenko ulteriuras sancziuns dal vest cunter Moscau. Putin stoppia immediat laschar liber la schuldada ucranaisa e laschar liber la mar per il traffic marin internaziunal, ha Poroschenko ditg en vista als mariners ucranais arrestads da la Russia. Tenor Poroschenko na sajan betg be bastiments ucranais bloccads davant la Crim. Il mument pertutgia quai er trais bastiments tudestgs.
La crisa tranter la Russia e l'Ucraina aveva cumenzà la dumengia cun ina confruntaziun en la Mar Naira. En la stretga da mar Kertsch, aveva la Russia sajettà sin 3 bastiments ucranais e prendì en fermanza las equipas da quests bastiments. Sin quai aveva l’Ucraina proclamà il dretg da guerra.
RR novitads 06:00