Siglir tar il cuntegn
cuntegn

Exteriur Ucraina pretenda puspè truppas da pasch

Il parlament ucranais vul che truppas da pasch internaziunalas segireschan la pasch al cunfin cun la Russia. Necessari è dentant in mandat da l'Uniun europeica e da las Naziuns Unidas.

Il president da l'Ucraina Petro Poroschenko.
Legenda: Grev temp per Poroschenko: Malgrà l'agid dal vest n'è la situaziun economica betg cuntantaivla. Reuters

La regenza ucraniasa ha gia pliras giadas dumandà per in'acziun da truppas da segirtad, ma la communitad internaziunala na vegn betg perina, sch'ina tala acziun vegnia ad avair success. Perquai che la Russia sustegn ils rebels en il Donbass refusescha l'Ucraina dentant in'eventuala participaziun russa ad ina tala acziun.

Poroschenko engrazia per agid internaziunal

Curt avant l’inscunter dals stadis G7 da la fin d’emna ha Porschenko engrazià en siu pled da la naziun als donaturs dal Fond monetar internaziunal (IWF) sco era da l’UE e dals Stadis Unids per lur agid finanzial. Quai agid haja evità in bancrut dal stadi, ha ditg Poroschenko.

Credits per refurmas

Crediturs internaziunals han segirà a l’Ucraina ina summa d’agid da sur 40 milliardas dollars. Da quella summa vegnan 17,5 milliardas dollars dal IWF. Quel percunter pretenda refurmas dal stadi.

Il vest duai far pli grondas stentas

Poroschenko da sia vart pretenda pli fermas stentas da las regenzas dal vest per renovar l’economia ucranaisa. Sco tuts saja el malcuntent cun la sveltezza dals process da refurma, ha ditg il president.

Entant vesan observaturs vinavant gronds problems economics per l’Ucraina.

RR novitads 15:00